“Pơsit pran, khom ngă klă  kơčăo bruă tuh pơplai bruă hrŏm thun anai pioh djru dưi ngă tơhnal ba tơbiă pơđĭ kyar 8%”. Anai lĕ tơlơi rơkâo mơ̆ng Kơ-iăng Khua dêh čar ơi Mai Văn Chính amăng mông jơnum lăng nao rai mơ̆ng ataih mơ̆ng Khul hyu mă bruă mrô 7 kơ pel ĕp pơtrut, pơtlaih tơnap, tơlơi gun pơtrut prăk tuh pơplai bruă hrŏm thun 2025 mơ̆ng 5 bôh tơring čar kual Dap Kơdư. Amăng mông jơnum hơdôm bôh tơring čar hmâo lăi pơthâo glăi hăng ngă rơđah tơlơi tơnap, tơlơi gun, bôh than ba truh hăng ba tơbiă jơlan pơsir hăng sa dua rơwang bruă tuh pơplai bruă hrŏm.

Pơhiăp amăng mông jơnum, Kơ-iăng Khua dêh čar ta ơi Mai Văn Chính lăi rơđah, thun anai lĕ thun pioh đĭ rơnoh pơđĭ kyar, ngă tui kơčăo bruă 5 thun 2021-2025, hăng pran pơsĭt pơđĭ kyar mơ̆ng 8% hăng lu hloh. Lăi rơđah Gong gai dêh čar, Khua dêh čar đing nao biă git gai, črâo ba, khom ngă kơjăp bruă tuh pơplai hrŏm, Kơ-iăng Khua dêh čar ta brơi thâo, phrâo rơgao Gong gai dêh čar hmâo pơjing 7 grŭp mơnuih hyu mă bruă kiăng hmâo tơlơi pok pơhai bôh tơhnal ngă tui, gah bruă pơpha prăk, pơsir prăk tuh pơplai bruă hrŏm. Tui hăng Kơ-iăng Khua dêh čar mơ̆ng ră anai truh rơnuč thun amra lu bruă tơnap, yua anun rơkâo, kiăng pơphun ngă tui ba glăi bôh tơhnal pơsir prăk mă yua pơ̆ anăp, 5 bôh tơring čar kual Dap Kơdư khom pơtrut kơtang dong bruă iâo pơhrui abih bang glông bruă kơđi čar pơphun amăng bruă ngă tui hăng ba glăi bôh tơhnal. Mơ̆ng anun djru amăng tơlơi pơđĭ kyar bơwih ƀong mơ̆ng lŏn ia, ba glăi bôh tơhnal ba tơbiă pơđĭ kyar 8% amăng thun anai./.