Jơlan rơdêh đuăi hmar Bảo Lộc - Liên Khương glông giăm 74km, tô nao rai plơi prong Bảo Lộc hăng Đà Lạt, đuăi găn nao tơring glông Bảo Lâm, Di Linh hăng Đức Trọng tơring čar Lâm Đồng. Amăng rơbêh 17.700 klai prăk tuh pơ alin, hơmâo rơbêh 7.600 klai mă mơ̆ng Kơnuk kơna, mrô dŏ glăi yua pô tuh pơ alin gơgrong.

Kơčăo bruă yua Kông ti pơčruh ngăn Tuh pơ alin Grup bơwih ƀong Phương Trang - FUTA Group pơ ala pô tuh pơ alin. Jơlan hơmâo 51 ƀĕ tơdrông toa, amăng anun hơmâo 13 ƀĕ tơdrông phun, 35 tơdrông đuăi hăng ngŏ jơlan hăng 3 ƀĕ tơdrông pơtruh kual anai kual adih. Ƀơi hră pơsit, ơi Trần Hồng Thái, Khua jơnum min mơnuih ƀôn sang tơring čar Lâm Đồng kiăng hơdôm gơnong bruă, anom bruă, hơdôm anom apăn bruă bơdjơ̆ nao gum ngă, pơtô ba, ngă hrŏm pel ĕp bruă man pơkra djơ̆ hăng tơlơi phiăn. Laih dong, ječ ameč akŏ pơdong kual plơi pla phrâo, duh prăk kăk, čuk pơkra anih ngă jơlan đah mơ̆ng dưi man pơkra amăng hrơi blan pơ anăp./.