Truh mông anai, Hră čih pơkra Tơlơi phiăn lăng tui mơ̆ng Khua pơ ala mơnuih ƀôn sang dêh čar Khul Khua pơ ala mơnuih ƀôn sang pơhrua nao 51 mơta tơlơi/91 mơta tơlơi bơhmu hăng Tơlơi phiăn mă yua ră anai hmâo giăm truh 60%. Kơ-iăng Khua git gai pơ ala mơnuih ƀôn sang dêh čar ơi Trần Quang Phương brơi thâo tal jơnum lok 9 pơ̆ anăp anai, Khua pơ ala mơnuih ƀôn sang dêh čar amra pel ĕp bruă pơplih pơkra, pơhrua nao Phiah phiăn, Tơlơi phiăn pơphun bruă gong gai plơi pla hăng lu rơwang bruă Tơlơi phiăn pơkon, amăng anun hmâo lu bôh yôm bơdjơ̆ nao ƀơi anăp Tơlơi phiăn lăng tui mơ̆ng Khua pơ ala mơnuih ƀôn sang dêh čar hăng Khul Khua pơ ala mơnuih ƀôn sang, ba tơbiă tơlơi kiăng kơsem min dong pơplih phrâo abih bang hăng rơwang bruă tơlơi phiăn.

Kơ-iăng Khua git gai pơ ala mơnuih ƀôn sang dêh čar ơi Trần Quang Phương lăi rơđah khom lăi pơthâo abih tơlơi pơplih phrâo tơlơi pơmin, pơplih phrâo hơdră čih pơkra tơlơi phiăn, kiăng pơhlôm tơlơi phiăn pơtlaih hơdôm tơlơi gun hmâo amăng bruă lăng tui. Khom kơsem min dong kiăng čih pơkra tơlơi phiăn rơguăt lăi pơthâo kơ Khua pơ ala mơnuih ƀôn sang dêh čar gum pơhiăp amăng tal jơnum lok 9./.