Tui tơlơi pơtrun mơng Khua dêh čar, Khul wai lăng hơdôm kual bơwih ƀong huă hăng hơdôm kual tuh tia pơkra ming Dak Lak hơmâo akŏ pơjing hluai tui tơlơi pơmut hrŏm mơng Khul wai lăng kual bơwih ƀong huă Phú Yên, Khul wai lăng hơdôm kual tuh tia pơkra ming tơring čar Dak Lak hăng Khul wai lăng kual ngă hmua yua boh thâo phrâo Phú Yên. Amăng mông jơnum, Jơnum min mơnuih ƀon sang tơring čar Dak Lak ăt lăi pơthâo tơlơi pơsit pơhrua 9 čô mơnuih apăn bruă ngă khua apăn akŏ khul wai lăng.

Ơi Huỳnh Lữ Tân, Khua khul wai lăng kual bơwih ƀong huă Phú Yên, hơmâo ruah ngă Khua khul wai lăng hơdôm kual bơwih ƀong huă hăng hơdôm kual tuh tia pơkra ming Dak Lak. Khua Jơnum min mơnuih ƀon sang tơring čar Dak Lak ơi Đỗ Hữu Huy rơkâo Khul wai lăng ječ ameč hơđong bruă dưm dăp, pơhlôm huăi ngă gun bruă; laih dong tŏ tui tơlơi gơgrong amăng bruă wai lăng; pơhưč tuh pơ alin, djru bruă bơwih ƀong sĭ mơdrô hăng pơtrut ngă tŭ yua hơdôm bruă mă mơng kual bơwih ƀong, kual tuh tia pơkra ming, kual ngă hmua yua boh thâo phrâo amăng tơring čar.