Kơ-iăng khua mir sir yă Võ Thị  Ánh Xuân brơi nao 210 anung gơnam Trung thu kơ ƀing čơđai glăk pơjrao ƀơi Sang ia jrao ngă añrăng drơi jăn tơring čar Tuyên Quang; laih dong brơi kơ Sang ia jrao 200 klăk prăk. Tơña bla, juh alum ƀing čơđai ruă, čơđai drơi jăn ƀu klă, jô găng, Kơ-iăng khua mir sir yă Võ Thị Ánh Xuân bơni hơ-ơč kơ ƀing čơđai mơak amăng blan bơrơmi anai; hrăm hră rơgơi, săng, tui kơ amĭ ama, gir đih pơjrao, tañ suaih pral.

Lăi dlăm, čơđai jing tơlơi đĭ kyar lŏn ia ta pơ anăp, Kơ-iăng khua mir sir kiăng bruă lăng ba, čem rông hăng pơđĭ tui tơlơi suaih pral kơ ƀing čơđai hơmâo lăng ba, djru brơi hlâo. Laih dong kiăng djŏp gưl, anom bruă, mơnuih mơnam lăng ba klă hloh dong kơ čơđai rơwen rơwô jô găng, čơđai sang anŏ tơnap, kơƀah kơtang; djru brơi ƀing čơđai dưi hrăm hră, hơmâo lăng ba tơlơi suaih pral, mut hrŏm mơnuih tơpuôl hăng dưi kjăp tơlơi pơmin pran jua djŏp mơta.