Gia Lai glăk amăng bơyan phang khôt kơtang, amra hmâo apui ƀong glai kơtang tal V – tơhnal kơtang hloh. Ră anai, hơdôm rơtuh rơbâo ektar glai ƀơi kah hăng abih bang hơdôm bôh tơring glông mơ̆ng tơring čar Gia Lai glăk bŏng glăi hăng tơlơi huĭ rơhyưt amăng krah bơyan phang khôt. Amăng anun, tơring glông Čư̆ Pah hmâo rơbêh kơ 7.169 ektar, lu ñu ƀơi hơdôm bôh să Hòa Phú, Nghĩa Hưng, Čư̆ Đang Ya, Đăk Tơ Ver, Ia Khươl hăng tơring kual Phú Hòa gah ƀut amra hmâo apui ƀong prong. Biă ñu, glai kyâo hngô 3 pok hla hăng rok rôm kơpal ƀơi lŏn jing anô̆ amuñ ngă apui ƀong hloh.

Kiăng plai ƀiă tơlơi apui ƀong amra hmâo, dong mơ̆ng akô̆ bơyan phang mơtăm, hơdôm anih anom amăng tơring čar Gia Lai ngă giong tui Grŭp git gai pơgang apui ƀong glai, čih pơkra kơčăo bruă bŏng glăi. Khul apăn bruă anai kơtưn hyu lăi pơhing, pơtô brơi mơnuih ƀôn sang mă yua apui pơhlôm klă, lăng tui kơjăp amăng hơdôm hrơi blan phang khôt kơtang. Hơdôm grŭp wai lăng glai gum hrŏm hăng gong gai plơi pla hăng mơnuih wai lăng glai kyâo ƀu mă yua apui ča čot, hrŏm hăng anun hlă hnal lăi pơtă ƀơi hơdôm kual phun kiăng pơgang./.