Đĭ pơhiăp amăng mông ngă lơphet, Khua dêh čar ơi Phạm Minh Chính lăi pơtong: Bruă “mơnuih ƀôn sang hrăm yua boh thâo phrâo” yôm phăn biă mă hăng ba glăi tơlơi hiam klă hăng bruă pơđĭ kyar lŏn ia, pơdah tơlơi gir run mơng Ping gah, kơnuk kơna amăng bruă pơđĭ kyar kơnuk kơna mrô, bơwih ƀong mrô, mơnuih mơnam mrô, mơnuih ƀon lan rơgơi, pơplih phrâo hăng hiam klă; ngă tui gru grua gir kơtir hrăm tui, pran jua pơhrăm pô truh djai ba mơng djuai ania Việt Nam.

Lăng glăi 80 thun hlâo adih, lơm lŏn ia phrâo pơklaih rơngai rơbêh 95% mrô mơnuih aka ƀu thâo pơđok, aka thâo čih….bruă pơphun “pơtô brơi mơnuih ƀôn sang hrăm hră” akŏ pơjing hăng hơnong pơkă ječ lĕ pơtô brơi mơnuih ƀôn sang thâo hră, hrưn đĭ tơlơi thâo thăi amăng mơnuih ƀôn sang hăng kơnong amăng ƀiă hrơi, hơdôm klăk čô mơnuih Việt Nam thâo pơđok, thâo čih, pơgôp yôm amăng bruă pơjing hăng wai pơgang lŏn ia, Khua dêh čar lăi rơđah, lŏn ia ta glăk dong ƀơi anăp tơlơi dưi prong kiăng yak nao rơnuk phrâo, pơđĭ kyar kơtang hăng tơlơi pơtrut phun mơng boh thâo măi mok, boh thâo ia rơgơi, pơplih pơčeh phrâo hăng pơplih mrô.