Ƀơi Điện Kính Thiên hăng pran jua hơdor tơnga tơlơi gum pơgôp prong prin mơng ƀing ơi pơtao, pơdah pran “Mơñum ia hơdor kơ pô klơi” mơng djuai ania Việt Nam, Khua dêh čar ơi Phạm Minh Chính hrŏm hăng ƀing khua mua Ping gah, Kơnuk kơna hăng khua mua hơdôm boh ƀon lan nao tŭi ñang, dưm guang bơnga, pơdah pran hơdor tơngia hăng ƀing mơnuih pơjing hăng wai pơgang lŏn ia kiăng kơ ană tơčô tŏ tui gru grua Lạc Hồng amăng pơjing lŏn ia Việt Nam jai hrơi hiam klă tui ră anai.

Amăng mông yôm phăn ƀrô hrơi huă pơsat ơi pơtao, abih bang mơnuih ƀôn sang Việt Nam amăng lŏn ia kah hăng pơ tač rơngiao, lêng kơ anăp nao pra yang ơi pơtao Hùng hăng pran jua hơdor tơngia tơlơi gum pơgôp prong prin mơng ƀing ơi pơtao Hùng, ƀing mơnuih pơjing hăng wai pơgang lŏn ia. Tơdơi kơ mông tŭ ñang, Khua dêh čar ơi Phạm Minh Chính hăng ƀing khua mua hơmâo nao dưm guang bơnga, tŭi ñang ƀơi pra yang ơi pơtao Hùng; dưm guang bơnga ƀơi rup trah pioh hơdor Wa Hô, hiăp bit hăng ƀing apăn bruă, khul ling tơhan Tiên Phong ƀơi jơlan tơkuh rơma ară pran yang Giếng.