Mơguah lơ 16/3, Khua dêh čar ơi Phạm Minh Chính ngă bruă hăng khua mua tơring čar Hải Dương pơtŏng glăi boh than ngă bruă pơđĭ kyar bơwih ƀong huă - mơnuih mơnam, akŏ pơjing anom bruă kơnuk kơna thun 2022 laih anun jơlan hơdră pơđĭ kyar amăng rơwang pơ anăp; laih dong pơsir hĭ hơdôm tơlơi rơkâo đĭ đah mơng djru brơi Hải Dương pơđĭ kyar tañ, hơđong kơjăp. Pơhiăp kah čun mông jơnum, Khua dêh čar ơi Phạm Minh Chính hơmâo pơblang rơđah kơ tơlơi gêh gal, tơlơi dưi pơhno hrŏm arăng hăng hơdôm tơlơi aka ƀu dưi, aka ƀu djơ̆. Amăng hrơi blan pơ anăp, Khua dêh čar git gai, tơring čar kiăng lăi pơthâo rơđah kơ abih bang, pơphun ngă tŭ yua Tơlơi pơtrun jơnum ping gah dêh čar tal 13, hơdôm Tơlơi pơtrun mơng Ping gah hăng Tơlơi pơtrun jơnum ping gah tơring čar; hla tui, ngă tui djơ̆ tơlơi pơtô mơng Ping gah, tơlơi phiăn mơng Kơnuk kơna laih anun tơlơi git gai črâo bruă mơng Kơnuk kơna, mơng Khua dêh čar.

Khua dêh čar kiăng tơring čar Hải Dương ngă hrŏm hăng Ding jum gru grua boh thâo - bơkơjăp drơi jăn hăng tuai čuă ngui, tơring čar Quảng Ninh hăng hơdôm boh tơring čar bơdjơ̆ nao ngă pơgiong hră pơ-ar pok prong čuk pơkra Kual anih gru đưm “Yên Tử - Vĩnh Nghiêm - Côn Sơn, Kiếp Bạc”. Laih dong iâu pơthưr mă yua djŏp tơlơi hơmâo, biă ñu lĕ ngă hrŏm kơnuk kơna hăng mơnuih ƀon sang wai lăng, tuh pơ alin ming pơkra, pơjing glăi, pơtrut tui gru grua yôm, hyu tuai hyu ngui ƀơi Kual gru grua đưm anai.