Ƀơi mông pơhiăp telephôn, Khua dêh čar ta ơi Phạm Minh Chính lăi, Kơnuk Kơna Việt Nam amra ngă hrŏm tong ten hăng Kơnuk kơna dêh čar Singapore kiăng ba tơlơi ngă giăng mah pŭ ƀăn dua bơnah pơđĭ kyar tui hăng kjăp hloh, tŭ mă lu boh tơhnal klă hiam, sit nik, lăp hăng bruă ngă ba jơlan hlâo amăng bruă mă lơ̆m kual ASEAN laih anun hơbô̆ bruă ngă gru pioh pơtrut djop bruă, ngă hrŏm hăng dêh čar pơkŏn amăng kual.

Khua dêh čar Singapore lĕ lăi, ăt pơtrut bruă pơčrong sai nao rai grup khua mua, bưp nao gưl kơnuk kơna kah hăng pơkra hơdră ngă hrŏm dua bơnah, boh nik ñu pơphun bưp nao rai re se plah wah dua čô khua dêh čar kiăng kơtưn bruă ngă giăng mah pŭ ƀăn hăng đăo kơnang nao rai tong ten bruă kơđi čar. Gah bruă mă amăng kual, dua bơnah tŭ ư kơtưn ngă hrŏm thâo gum pơgôp nao rai amăng ASEAN, dong yua dêh čar Lao ngă khua kual dưi tŭ yua amăng thun ngă khua ASEAN 2024 anai, đing nao lăp hăng bruă mă pơđĭ kyar hơđong kjăp lơ̆m kual, amăng anun hơmâo kual rôk tui ia krông Mekong,  hơdôm dêh čar amăng kual anet dua bơnah hang ia krông Mekong, mơ̆ng anun kiăng ngă tui hur har hloh pơtrut ASEAN hrưn đĭ pô, pơdrong sah hăng pơđĭ kyar hơđong kjăp, pơđĭ tui tơlơi gơgrong ba jing anih anom tong krah, phun amăng kual.