Pơhiăp amăng mông jơnum, ơi Phạm Minh Chính lăi pơtong, amăng abih rơnuk gru phun čih pioh bruă akŏ pơdong hăng pơgang lŏn ia djuai ania ta, mah găn rơgao lu wơ̆t pơblih anăn, akŏ pơdong glăi hăng pơkă guai tơring čar, Quảng Bình ăt jing kual lŏn hmư̆ hing, hơmâo lu mơnuih khin hơtai, anih anom yôm kơ dêh čar, pơhlôm rơnuk rơnua pơgang lŏn ia mơ̆ng rơnuk dêh čar hơmâo pơtao pơtung đưm adih, anih hơmâo ƀuh lu bruă djă pioh gru phun lŏn ia, tŭ lu tơlơi răm ƀăm, ruă nuă, kah pơpha hăng pơphun kơ bruă pok prong tui dêh čar nao pơ dơnung jing lŏn ia Việt Nam prong hing ang ră anai.

Hrơi blan pơ anăp adih, kơnang kơ atur hơđong kjăp hăng boh tơhnal tŭ mă yôm mơ̆ng đưm, tơdơi kơ 50 thun pơklaih rơngai lir hơbit truh kih lŏn ia, 35 thun akŏ pơdong glăi tơring čar, hrŏm hăng bruă ngă lăng nao anŏ bơngač pơ anăp adih, Quảng Bình hơmâo anŏ gêh găl prong pioh pơđĭ kyar kơtang hloh, amra jing tơring čar pơđĭ kyar lu hloh amăng kual tong krah laih anun anŏ phun ñu pơđĭ kyar bruă sĭ mơdrô, čơkă tuai, tuh tia pơkra ming gơnam sĭ mơdrô hơdjă rơgoh, pơkra apui yua hơdjă, bruă pơkra ming gơnam tam sĭ mơdrô, ngă hmua pla pơjing tui boh thâo ia rơgơi phrâo, pơgang ayuh hyiăng hiam klă glai klô, čư̆ čan, hăng bruă mă gơgrong ba kjăp.