Pơhiăp ƀơi mông jơnum, Khua dêh čar ơi Phạm Minh Chính lăi, tơlơi răm ƀăm ma túy glăk jing tơlơi truh prong hăng ană mơnuih. Tơlơi truh yua mă yua ma túy kơtang biă mă gah bruă bơwih ƀong, gru grua, mơnuih mơnam, rơnuk rơnua - pơgang lŏn ia, ngă sat kơ tơlơi suaih pral mơnuih ƀon sang, laih dong jing phun tơhnal hơmâo mơnuih ngă soh, ngă rung răng plơi pla, ngă rung răng bruă đĭ kyar mơng rim boh dêh čar, rim djuai ania.

Pơ ala kơ Kơnuk kơna, Khua dêh čar bơni hơ-ơč kơ hơdôm tơlơi gir run, tơlơi gum pơgôp; pơpŭ bơni hơdôm tơlơi gum djru djai drơi pô amăng bruă mă; laih anun hơ-ơč kơ hơdôm tơlơi hơmâo ngă rơgơi mơng ƀing khua, tơhan kông an, djŏp gưl, anom bruă amăng pơgang pơgăn mơnuih ngă soh gah ma túy amăng hrơi blan rơgao, gum djru yôm pơđĭ kyar hăng pơhlôm rơđong rơnuk rơnua mơnuih mơnam mơng lŏn ia. Kiăng pơplih kơtang hloh amăng bruă pơgang, pơgăn jrao ma túy, Khua dêh čar kiăng bruă pơgang, pơgăn hăng krăo lăng ma túy mơng djŏp gong gai, amăng anun hơmâo Kông an mơnuih ƀon sang khŏm ngă pô ba jơlan hlâo.