Hrơi blan rơgao, Ping gah, Kơnuk kơna hơmâo pioh lu prăk kăk pơđĭ kyar jơlan nao rai, tuh pơ alin amăng bruă yôm phun, ƀơi hơdôm kual plơi pla. Pơhiăp ƀơi mông jơnum pơkra jơlan, Khua dêh čar ơi Phạm Minh Chính črâo rơđah, Kơčăo bruă jơlan rơdêh đuăi hmar Tuyên Quang - Hà Giang glông 105km, tuh pơ alin 10 rơbâo klai hơmâo Kơnuk kơna brơi kơ 2 boh tơring čar Tuyên Quang hăng Hà Giang ngă pô wai lăng gơgrong pơkra, kiăo tui hơdră tuh pơ alin kơnuk kơna jao prăk amăng Jơlan hơdră rŭ glăi hăng pơđĭ kyar bơwih ƀong huă mơnuih mơnam.

Anai jing bruă pơsit brơi Tơlơi pơtrun mơng Ding jum kơđi čar kơ hơdră pơđĭ kyar bơwih ƀong huă - mơnuih mơnam, pơhlôm pơgang lŏn ia, rơnuk rơnua kual giăm hang ia krông hăng čư̆ siăng Kơdư dêh čar truh pơ thun 2030, lăng nao pơ anăp truh pơ thun 2045. Khua dêh čar kiăng, tơdơi kơ pơphun ngă, kiăng hơdôm anom bruă pơƀut abih pran jua gir ngă truh kih djŏp bruă hơmâo jao.