Ƀơi mông tŭ jum, Khua dêh čar ơi Phạm Minh Chính hok mơak ƀuh khua ding jum pơtom hiăp dêh čar Brazil tal dua rai čuă dêh čar Việt Nam ta laih anun lăi pơthâo tơlơi pơhing hiam mơak kơ lŏn ia hăng mơnuih ƀôn sang dêh čar Brazil hlăk tal nao čuă blan 9/2023 rơgao; bơni kơ jơlan hơdră mơ̆ng kơnuk kơna yua khua mir sir ơi Lula da Silva git gai, kiăng ngă kjăp tui hăng pơđĭ kơnuih hiam bơwih ƀong huă, bruă kơđi čar, tơlơi gơgrong kjăp mơ̆ng dêh čar Brazil amăng kual hăng amăng rŏng lŏn tơnah laih anun đăo sit lĕ, tal rai čuă jơmư anai mơ̆ng Khua ding jum pơtom hiăp, ơi Mauro Vieira amra pơtrut tui tơlơi ngă giăng mah, bruă ngă hrŏm hlom bom plah wah Việt Nam hăng Brazil; jing yak rơbat tong ten hloh pioh pok pơhai ngă tui hơdôm pok hră pơkôl pơkă mơ̆ng khua mua pơprong dua bơnah thun blan rơgao, boh nik ñu amăng bruă dua boh dêh čar hơmâo tơlơi gêh găl laih anun akŏ kiăng, yua boh tŭ yua kơ mơnuih ƀôn sang dua bơnah, yua tơlơi rơnuk rơnua, ngă hrŏm hăng pơđĭ kyar ƀơi dua boh kual hăng rŏng lŏn tơnah.

Khua ding jum ơi Mauro Vieira ăt lăi pơthâo hăng Khua dêh čar hơdôm boh yôm phun mă bruă bơkơtuai nao rai hăng Khua ding jum pơtom hiăp ơi Bùi Thanh Sơn; brơi thâo dua bơnah rơkâo đĭ lu hơdră ngă hrŏm Việt Nam-Brazil thun blan pơ anăp, boh nik ñu dua bơnah hơmâo tơlơi kơtang, gêh găl hăng đing nao kơ bruă ngă hmua, boh thâo ia rơgơi, pơblih hơdră pơkra apui lơtrik, ba yua jua kơtang mơ̆ng lŏn mơnai adai rơngit bơwih brơi bruă mă.