Ƀơi mông bưp, Khua dêh čar ơi Phạm Minh Chính bơni kơ bruă tuh pơ alin tŭ yua mơ̆ng hơdôm grup bơwih ƀong; hok mơ-ak hơdôm grup glăk hăng amra tuh pơ alin pơ Việt Nam; kiăng hơdôm Grup bơwih ƀong amăng mông kơsem min pok pơhai kơčăo bruă ngă hrŏm tong ten, ngă hrŏm kjăp hăng hơdôm Ding jum, anom bơwih ƀong mơ̆ng Việt Nam hăng hơdôm bơnah bơdjơ̆ nao pok pơhai bruă ngă djơ̆ tơlơi phiăn, mă yua boh thâo phrâo, djru lu ƀiă, jao glăi boh thâo măi mok, ba hơdôm anom bơwih ƀong Việt Nam mut hrŏm dlăm hloh amăng bruă sĭ mơdrô abih bang. Khua dêh čar brơi thâo, Việt Nam ƀuăn amra ngă gêh gal brơi kiăng Grup bơwih ƀong tuh pơ alin sĭ mơdrô tŭ yua, hơđong kjăp ƀơi Việt Nam; pơgang ba tơlơi dưi, tơlơi lăp djơ̆ mơ̆ng anom bruă tuh pơ alin.