Ƀơi mông čơkă jum, Khua dêh čar ơi Phạm Minh Chính lăi pơtong, Việt Nam lăng yom biă mă hăng pioh bruă ngă hlâo hloh kơ tơlơi giăng mah hing ang prong prin plah wah Việt Nam-Lao. Bruă ngă hrŏm kơđi čar jai hrơi kơjăp, tong ten hăng đăo kơnang nao rai prong biă mă. Djop bruă mă ngă hrŏm phun kah hăng bruă mă gah ling tơhan, pơgang rơnuk rơnua, bơwih ƀong huă, gru grua hiam, pơtô pơjuăt hăng ngă hrŏm plah wah djop tơring čar dua bơnah dưi đing nao pơbŭ tui laih anun hơmâo yăk phrâo pơđĭ kyar kơtang.

Dua bơnah tŭ ư ngă hrŏm, prăp lui klă jơnum lok 47 mơ̆ng Jơnum min pơlir dua kơnuk kơna, khut khăt kiăng tŭ mă boh tơhnal prong hloh amăng thun 2025. Dua bơnah đing nao pơtrut djop ding jum, anom bruă ngă hrŏm bơwih ƀong huă, sĭ mơdrô tuh pơ alin. Kơ-iăng Khua dêh čar Lao ăt lăi, amra pơtrut djop anom bruă gah dêh čar Lao, pơblih hơdră ngă hră pơar, kiăng ngă amuñ brơi bruă tuh pơ alin kơ djop sang bruă sĭ mơdrô mơ̆ng dêh čar tač rơngiao, amăng anun anom bruă sĭ mơdrô mơ̆ng dêh čar Việt Nam nao tuh pơ alin sĭ mơdrô, bơwih ƀong huă ƀơi dêh čar Lao.