Tlam lơ 6/4, ƀơi sang bruă Kơnuk kơna, Khua dêh čar ơi Phạm Minh Chính tŭ jum Kơ-iăng khua dêh čar Nga ơi Dmitry Chernyshenko glăk rai čuă sit nik dêh čar Việt Nam laih dong gum git gai Jơnum tal 24 mơng Jơnum min pơlir hơbit Kơnuk kơna Việt Nam - Nga kơ tơlơi bơwih ƀong huă - sĭ mơdrô hăng boh thâo kĭ thuâ̆t mơng lơ 5 truh lơ 7 blan 4 thun 2023. Ƀơi mông bưp, Khua dêh čar ơi Phạm Minh Chính pơsit Kơnuk kơna Việt Nam lăng yôm biă tơlơi rô nao rai mơ-ak, ngă hrŏm klă hiam tui pran jua Gŏp ngă hrŏm amăng abih bang bruă kơplah wah Việt - Nga.

Dua bơnah lăng yôm hơdôm tơlơi hơmâo ngă amăng bruă ngă hrŏm hrơi blan rơgao hăng tơlơi rô nao rai kơđi čar hơmâo ngă na nao, ngă hrŏm amăng bruă mơng đưm hlâo hơmâo pơtrut tui; pơsit Jơnum tal 24 mơng Jơnum min pơlir hơbit Kơnuk kơna Việt Nam hăng Nga jing tơlơi gêh gal kiăng dua bơnah pơčrông sai, tŭ ư hơdôm hơdră pơđĭ kyar ngă hrŏm hloh dong, ăt kah hăng pok tơbiă tơlơi gêh gal phrâo đah mơng pok pơhai hơdôm bruă ngă hrŏm amăng hrơi blan pơ anăp.