Amăng mông bưp, Khua dêh čar Phạm Minh Chính pơpŭ bơni tơlơi čơkă yôm phăn hăng pơđao pran jua mơ̆ grup khua pơ ala giang mah lăi phara, Kơnuk kơna hăng mơnuih ƀôn sang Australia hnun mơn brơi kơ grup khua mua mơng Kơnuk kơna Việt Nam.

Khua dêh čar lăng yôm tơlơi rô nao rai ngă hrŏm kơplah wah Ƀirô Khua pơ ala mơnuih ƀôn sang dêh čar Việt Nam hăng Australia, kah hăng grup khua pơ ala giang mah dua boh dêh čar tŏ tui hruă kjăp, hăng hơdôm bruă pơbưp nao rai, pơhrăm, gum djru tơdruă, sit biă ñu pơtrut pơbưp nao rai khua pơ ala hlăk ai, ƀing khua pơ ala đah kơmơi…Khua dêh čar rơkâo Ƀirô Khua pơ ala mơnuih ƀôn sang dua bơnah tŏ ngă tui tơlơi pơkôl mơ̆ dua bơnah hơmâo kĭ; dong yua hăng krăo lăng bruă ngă tui hơdôm tơlơi ƀuăn kơplah wah Kơnuk kơna dua bơnah, ngă tui tơlơi rô nao rai ngă hrŏm sui thun djop mơta kơplah wah Việt Nam-Australia sit nik, tŭ yua.