Tui hăng bruă mă mơguah anai lơ 6/3, Khua dêh čar Phạm Minh Chính amra pơhmư̆ mông jơnum abih bang mơ̆ng Mông Jơnum bơkơtuai hăng jơnum ƀiă mơnuih. mông Jơnum khua mua yôm amra pơphun mơ̆ng lơ 4 truh lơ 6/3 kơđŏm gru yôm amăng lŏn ia Australia hăng kual. Gru pơsit tơlơi buăn mơ̆ng Australia amăng bruă ngă hrŏm hăng kual ASEAN.

Tơlơi yôm phun mơ̆ng Jơnum khua mua yôm tal anai lĕ ngă lơphet 50 thun ngă hrŏm pơtom hiăp Australia hăng ASEAN laih anun amra pơƀut amăng 4 mơta bruă phun:  Sĭ mơdrô, Khua mua phrâo hmư̆ hing, Ayuh hyiăng hăng Apui lơtrik hơdjă, laih anun Ngă hrŏm gah ia rơsĭ. Hơdôm bruă mă tong ten hơmâo: Jơnum bơkơtuai CEO Anom bơwih ƀong amra pơƀut khua mua hơdôm anom bơwih ƀong mơ̆ng Australia hăng ASEAN, hơdôm bơnah bơdjơ̆ nao amăng bruă pơkra măi mok hăng hơdôm anom bruă kơnuk kơna či bơkơtuai hơdră pơđĭ tui sĭ mơdrô, tuh pơ alin dua bơnah; Jơnum hơdôm anom bơwih ƀong găp ƀrô hăng anet (SME); jơnum ayuh hyiăng hăng apui lơtrik hơdjă; Jơnum ngă hrŏm gah ia rơsĭ.