Mơguah lơ 5/4, ƀơi Viêng Chăn, dêh čar Lao, Jơnum gưl dlông tal 4 Khul ia krông Mekong jar kơmar hmâo pơphun hăng anăn ñu “Pơplih phrâo hăng gum hrom kiăng pơhlôm rơnuk rơnua ia yua hăng tơlơi pơđĭ kyar kơjăp phik mơng Kual ia krông Mekong”. Nao pơhmư̆ hmâo Khua dêh čar hơdôm bôh dêh čar Việt Nam, Lao, Kur, Khua čih pioh Anom bruă kông ngăn ia Thái Lan hrom hăng Khua mua hăng khua pơ ala hơdôm bơnah bơkơtuai, Gum hrom pơđĭ kyar, hơdôm khul grŭp jar kơmar, amăng kual, hơdôm khul grŭp mơnuih mơnam hăng plơi pla.

Khua dêh čar Phạm Minh Chính hmâo laih tơlơi pơhiăp yôm phăn amăng mông jơnum. Khua dêh čar ta pơdah pran jua bơngot kual ia krông glăk dŏng ƀơi anăp hơdôm tơlơi lông akă hmâo mơng hlâo yua kơ pơplih ayuh hyiăng ba truh, pran pơgô̆ mơng tơlơi kiăng pơđĭ kyar bơwih ƀong hăng tơlơi đĭ tui mă yua ia tañ dong; lăi rơđah, khom pơplih tơlơi pơmin gum hrom hăng hơdôm yak nao pơplih phrâo dưi ngă tui tơlơi kiăng ječ ba tơbiă ră anai, hrom hăng anun ba tơbiă sa dua mơta tơlơi kơ pơsit jơlan gah gum hrom mơng Khul pơ̆ anăp anai. Hrom hăng anun Khua dêh čar rơkâo, pơtrut pơđĭ kyar bơwih ƀong mơtah, bơwih ƀong pơsir akô̆ tlôn, pơđĭ kyar hơdôm mơta apui yua pơkra glăi, djru pơđĭ kyar kơjăp pơhlôm./.