Amăng hră mơ-it, Khua dêh čar lăi pơtong: Tết tui phiăn juăt Chôl Chnăm Thmây lĕ gru grua yôm phara mơng djuai ania Khmer, anai lĕ hrơi ngui ngor prong hloh amăng ha thun, yôm phăn biă mă, pok blung sa thun phrâo hăng tơlơi čang rơmang tơlơi hiam klă, tơlơi hơdip trơi pơđao yâo mơ-ak; ăt amăng bơyan anai ăt pơdah pran hơdor tơngia, luă gŭ kơ amĭ ama ơi yă. Ƀrô tal anai, pơ ala brơi khua mua Ping gah hăng Kơnuk kơna, Khua dêh čar mơ-it nao tơl abih bang mơnuih ƀôn sang, khua mua hăng ƀing ơi yơng yă phơ̆t mơng djuai ania Khmer hăng pran jua jê̆ giăm, tơlơi tơña bla hăng tơlơi pơpŭ hiam klă hloh.

Hăng rơbêh 1,3 klăk čô mơnuih, mơnuih djuai ania Khmer lĕ sa amăng hơdôm bơnah ƀu dưi pơčlah amăng mơnuih djop djuai ania Việt Nam, jing tơlơi gơgrong amăng bruă pơjing hăng wai pơgang lŏn ia. Khua dêh čar rơkâo djop gưl, gơnong bruă, gong gai ƀon lan prap lui klă hơdôm tơlơi gal brơi mơnuih djuai ania Khmer dưi čơkă thun phrâo Chôl Chnăm Thmây thun 2024 gum pơgô̆p, mơ-ak mơ-ai, hiam drơi jăn pran jua, rơnuk rơnua, pơkrem, lăp djơ̆ hăng tơlơi hơdip phrâo, tơlơi phiăn, gru grua hiam klă mơng djuai ania.