Ƀrô hơdor glăi 94 thun hrơi akŏ pơjing khul tơdăm dra rơnuk Cộng sản Hồ Chí Minh, lơ 26/3, Khua dêh čar ơi Phạm Minh Chính phrâo hơmâo mông bưp, bơ ră ruai tom hlăk ai hăng akŏ tơlơi ră ruai “Hlăk ai Việt Nam kơsung nao hlâo pơđĭ kyar boh thâo ia rơgơi, pơčeh phrâo hăng pơblih yua mrô dêh čar”. Ƀơi mông bơ ră ruai anai, Khua dêh čar ơi Phạm Minh Chính hăng khua mua hơdôm ding jum, anom bruă ƀơi gơnong dlông lăi glăi tơlơi tơña mơ̆ng ƀing hlăk ai kơ lu bruă mă yom, kah hăng: Pơphun bruă mă pơčeh phrâo; pơđĭ kyar boh thâo ia rơgơi ngă atur; pơđĭ kyar mơnuih thâo bruă, biă mă ñu amăng tơlơi thâo ia rơgơi mrô; jơlan hơdră kơnuk kơna djru kiăng pơhưč mơnuih rơgơi dŏ glăi mă bruă.

Khua dêh čar rơkâo kơ Hlăk ai Việt Nam djă pioh tơlơi khin hơtai kơsung nao hlâo, pơčeh phrâo hăng 5 mơta bruă mă prăp lui hlâo amăng bruă pơđĭ kyar boh thâo ia rơgơi, pơčeh phrâo hăng pơblih yua mrô; Prăp lui hơdră, hrăm tui, hơduah ĕp boh thâo phrâo, kơsem min boh thâo ia rơgơi, pơblih yua mrô; pơphun ngă hrŏm pơgiong hĭ tơlơi phiăn, pơblih hơdră jak iâu tuh pơ alin, ngă bruă sĭ mơdrô; prăp lui hlâo amăng bruă wai lăng boh thâo ia rơgơi kiăng mă yua ba glăi boh tơhnal prong, lu hloh; pơphun bruă mă, pơblih pơčeh phrâo, ba yua mrô; prăp lui bruă bưp nao rai, hrăm tơdruă, mut phung hăng jar kmar.