Tơlơi črâo trun lăi rơđah: Pơhlôm kơjăp hơđong apui yua mơ̆ng lŏn ia, djop apui lơtrik lĕ sa amăng bôh than phun pơhlôm rơnoh pơplih phrâo mơ̆ng bruă bơwih ƀong hăng pơsit bruă pơplih phrâo măi mok, pơplih phrâo rơnuk anai lŏn ia pơ̆ anăp. Kiăo tui anun, tơhnal pơkă pơđĭ kyar bơwih ƀong đơ đam dêh čar thun 2025 hrưn đĭ hmâo rơbêh kơ 8% hăng đĭ kyar bơwih ƀong rơwang 2026-2030 hrưn đĭ ƀơi rơnoh 2 mrô, khom hmâo apui yua đĭ truh 1,5 wot, pơkă hlâo hơnong ñu rim thun mơ̆ng 12% truh rơbêh kơ 16%.

Kiăng gơgrong hlâo hơdôm bruă pơsir mơ̆ng tañ, mơ̆ng ataih, pơhlôm khut khăt ƀu pioh kơƀah apui lơtrik amăng hơdôm tơlơi hmâo bưp, Khua dêh čar ta črâo ba hơdôm anih anom, anom bruă đing nao ngă tui bruă jao djop apui pioh kơ pơđĭ kyar bơwih ƀong mơnuih mơnam rơwang 2025-2030, pơhlôm hơđong apui yua mơ̆ng lŏn ia amăng rơnuk phrâo, lăng anai lĕ bruă jao kơđi čar yôm phăn. Đing nao pel ĕp glăi, kơsem min pơplih pơkra pơkă kual apui VIII pioh hmao tŭ mă hơdôm tơlơi kiăng, tơhnal pơpkă bruă mă phrâo gah pơđĭ kyar bơwih ƀong mơnuih mơnam; tŭ mă, pơhrua nao hơdôm rơwang bruă pơkĕ apui phrâo, apui mơtah, agaih, kơjăp sui thun./.