Pơhiăp amăng mông bưp ƀô̆ mơta, Khua dêh čar ta ơi Phạm Minh Chính hmâo mơ-ĭt laih tơlơi tơña bla, hơ-ưč hmưi tơlơi suaih pral, hơc-ưč hmưi klă hiam mơ̆ng Khua git gai Ping gah dêh čar ta ơi Nguyễn Phú Trọng truh ƀing neh met wa, adơi ayong, adơi amai tơhan Điện Biên, hlăk ai prong pran săn hơtai, mơnuih hmâo jao gum blah ayăt, mơnuih ƀôn sang djop djuai ania tơring čar Điện Biên hmâo gum hơgôp yôm phăn ba truh rơngai Điện Biên Phủ “hmư̆ hing hyu djop, ngă kơtuă rŏng lŏn”.

Khua dêh čar ta brơi thâo, hơdôm thun rơgao, hăng pran jua “ƀong bôh hơdor kơ pô pla, mơñum ia hơdor kơ pô klơi”, Ping gah, Kơnuk kơna ta đing nao pha ra hăng git gai, črâo ba ngă klă bruă hơdor tơngiă tla pran hăng pran jua gơgrong, pran jua pơpŭ hăng tơlơi hơdor tơngiă dơlăm; hmâo mă yua laih hăng pok pơhai ba glăi bôh tơhnal lu hơdră pơtrun, hơdră bruă pioh djru rơđah, sit nik hăng ling tơhan rơka, mơnuih duam ruă, sang anô̆ ling tơhan pơsăn drơi, hơdôm mơnuih djru ngă hơkrŭ đưm hăng mơnuih ngă hơkrŭ, lăng anai lĕ bruă jao gah kơđi čar yôm phăn, na nao hăng thâo tơngia, gơgrong. Pơ̆ anăp anai, Khua dêh čar ta rơkâo hơdôm gưl, hơdôm gơnong bruă, hơdôm anih anom ngă tui klă dong hơdră pơtrun mơ̆ng Ping gah, hơdră bruă, tơlơi phiăn mơ̆ng Kơnuk kơna, pơtrut kơtang hloh dong bruă bơwih brơi ling tơhan rơka ruă, duam ruă, sang anô̆ ling tơhan pơsăn drơi, mơnuih djru ngă hơkrŭ đưm hăng ngă hơkrŭ./.