Khua dêh čar pơtŏng sit amăng hơdôm hrơi jar kơmar glêh tơnap ră anai, Việt Nam gum hrŏm na nao hăng Cuba, lăi pơthâo tơlơi găn rơgao hăng djru Cuba yak rơgao tơlơi tơnap, ngă tui pran kơtang mơ̆ng pô pioh gum hrŏm đĭ kyar. Khua dêh čar ta rơkâo dua bơnah kơtưn bơkơtuai grŭp gưl dlông; gum hrŏm kơjăp pok pơhai hơdôm tơlơi pơkôl gưl dlông dưi hmâo amăng tal nao čuă Cuba mơ̆ng Khua git gai Ping gah dêh čar ơi Tô Lâm amăng blan 9/2024.

Khua Ding jum pơtom hiăp dêh čar Cuba pơdah pran jua bơni dơlăm mơ̆ng Ping gah, Kơnuk kơna hăng mơnuih ƀôn sang Cuba kơ pran jua gum hrŏm hơbit hăng tơlơi gum djru sit nik mơ̆ng Việt Nam hơdôm hrơi jê̆ hăng anai, biă ñu amăng bruă đang hmua hăng hơđong braih apiăng. Dua bơnah tŭ ư gum hrŏm pok pơhai klă, ba glăi bôh tơhnal hơdôm bruă ngă brơi tơlơi bơwih ƀong, sĭ mơdrô, tuh pơplai hăng lu mơta bruă gum hrŏm pơkon pơđĭ kyar lăp djơ̆ hăng tơlơi rô nao rai bruă kơđi čar phara ha jăn, djru sit nik kơ bruă pơđĭ kyar mơ̆ng dua bôh dêh čar./.