Ƀơi ƀirô mă bruă Kơnuk kơna, Khua dêh čar ta ơi Phạm Minh Chính hmâo tŭ jum ơi Dmitry Medvedev, Khua git gai Ping gah Lŏn ia Nga pơlir hơbit, Kơ-iăng Khua Khul pơgang rơnuk rơnua ala čar Nga ƀrô djơ̆ tal rai čuă dêh čar Việt Nam. Amăng mông tŭ jum, Khua dêh čar ta ơi Phạm Minh Chính pơtŏng sit Việt Nam kiăo tui kơjăp jơlan gah pơtom hiăp rơngai, gơgrong pô, mơ-ak klă, giăng mah, gum hrom hăng pơđĭ kyar, lu mơta, lu bơnah pơplih phrâo bruă rô nao rai; mut hrom klă hăng jar kơmar; jing gơyut, bơnah gum hrom đăo gơnang, jing ding kơna klă, hmâo bruă gơgrong amăng jar kơmar.

Gah pô, ơi Medvedev pơtŏng sit Ping gah Lŏn ia Nga pơlir hơbit dŏng yua na nao pơđĭ kyar gum hrom bruă ngă abih bang hăng Việt Nam, djă pioh hơkrŭ đĭ hơdôm bruă gum hrom mơng hlâo, hrom hăng anun pok prong gum hrom amăng hơdôm bruă bơwih ƀong – sĭ mơdrô, tuh pơplai, bôh thâo, tuai čuă ngui, gum hrom plơi pla, bơkơtuai mơnuih ƀôn sang. Dua bơnah pơtrut kơtang hăng ngă dơlăm gum hrom dua bơnah amăng hơdôm bruă kah hăng apui yua, ia jâu hyuh, bôh thâo phrâo – măi mok, pơtô pơhrăm – pơtô juăt./.