Bruă bơkơtuai dưi pơphun ƀơi Sang hră gưl dlông RMIT, ƀôn prong Melbourne, ala čar Victoria, yua kơ Ding jum kơčăo bruă hăng Tuh pơplai hăng Ƀirô anih jưh pơ ala kơ dêh čar Việt Nam ƀơi Australia gum hrŏm hăng Ƀirô sĭ mơdrô tuh pơplai Australia, Ƀirô anih jưh pơ ala kơ Australia ƀơi Việt Nam pơphun hăng tơlơi gum hrŏm mơ̆ng lu anom bơwih ƀong dua bôh dêh čar. Ƀơi anai, ƀing khua pơ ala dưi lăi pơthâo kơ tơhnal gal, anih anom tuh pơplai, bơwih ƀong sĭ mơdrô mơ̆ng Việt Nam hăng Australia; hmư̆ lăi pơthâo bruă mă hăng kơčăo bruă tuh pơplai, bơwih ƀong sĭ mơdrô mơ̆ng hơdôm bôh anom bơwih ƀong dua bôh dêh čar pơsit tơhnal gal pơđĭ kyar mơ̆ng anih blơi sĭ hră prăk ƀơi Việt Nam; pơsit bruă gum hrŏm tuh pơplai amăng bruă đang hmua mă yua hơdră phrâo mơ̆ng anom bơwih ƀong Việt Nam ƀơi Australia. Biă ñu, Bruă bơkơtuai pioh lu mông kơ hơdôm anom bơwih ƀong tơña hăng dưi hmâo khua git gai hơdôm ding jum, gơnong bruă dua bơnah lăi glăi kiăng đing nao kah hăng: Bruă pơđĭ kyar bơwih ƀong mơ̆ng rim bôh dêh čar; hơdôm bruă đing nao hlâo; hơdră pơkă hơdră bruă; hră pơ-ar, anom mă yua, mơnuih mă bruă... Hrŏm hăng anun, anom bơwih ƀong dua bơnah bơkơtuai nao rai, tô nao rai pioh gum hrŏm tuh pơplai, bơwih ƀong sĭ mơdrô.

            Pơhiăp amăng mông bơkơtuai, Khua dêh čar ta rơkâo amăng hră pơkôl gum hrŏm, dua bơnah đing nao pơtrut hơdôm pran pơtrut đĭ kyar mơ̆ng hlâo kah hăng tuh pơplai, sĭ gơnam kơ dêh čar tač rơngiao, blơi yua, pơplih mrô, pơplih mơtah. Khua dêh čar ăt čang rơmang mơn dua bơnah pơtrut kơtang gum hrŏm bơkơtuai mơnuih ƀôn sang, tuai čuă ngui, bôh thâo đưm hăng pơtô pơhrăm hluai tui gru than ngă tui kơtang gru grua pha ra ha jăn hăng lu mơta mơ̆ng dua djuai ania./.