Khua dêh čar lăng yom hơdôm bruă ngă pơgôp hrŏm hiam klă mơ̆ng khua anih jưh pơ ala, khua pơ ala djop sang bruă hơdôm dêh čar amăng kual hơmâo pơtrut bruă ngă giăng mah đĭ tui plah wah Việt Nam hăng kual ASEAN. Khua dêh čar lăi pơtong, Việt Nam lăng yom hăng pioh tơlơi djru ba lu kơ bruă ngă giăng mah pŭ ƀăn hơdôm dêh čar jĕ giăm ieo gah; ƀuăn pơtrut tui bruă ngă hrŏm tŭ yua ba glăi boh tơhnal hiam klă hloh amăng kual ASEAN.

Khua dêh čar rơkâo hơdôm dêh čar, khua anih jưh pơ ala, ƀing pơ ala djop anom bruă djru hrŏm lu hloh kiăng pơđĭ kyar kơtang rô nao rai plah wah Việt Nam hăng djop dêh čar ASEAN pơ anăp anai. Rơkâo kual ASEAN gir run hloh ngă dơlăm tui tơlơi pŭ ƀăn sĭ mơdrô-tuh pơ alin amăng kual, amăng khul, ba yua djop bruă mă, tơlơi gêh găl ia rơgơi tơlơi kơhnâo mrô, pơblih pơčeh phrâo, kơtưn ngă hrŏm amăng lu bruă pơkra jơlan, apui yua rơgoh…; ngă kơjăp tui tơlơi rô nao rai gru grua mơ̆ng đưm, pơtrut tơlơi jĕ giăm nao rai mơnuih ƀôn sang lir hơbit, akŏ pơdong khul ngă hrŏm amăng kual ASEAN hlom bom hăng hơđong kơjăp, mă anŏ tŭ yua kơ mơnuih ƀôn sang yơh ngă anŏ pơkă phun kơ jơlan hơdră, bruă gum hrŏm kơñ pơgi.