Amăng mông bưp, kiăng pơtrut ƀiă dong tơlơi rô nao rai kơplah wah dêh čar Việt Nam-Mi lăi hrŏm hăng tơlơi rô nao rai kơplah wah Ding jum kông ang hăng hơdôm anom bruă ngă hrŏm pơ dêh čar Mi hnun mơn, Khua ding jum Tô Lâm rơkâo dua bơnah tŏ tui ngă hrŏm kjăp, tañ hơmâo hơdôm tơlơi yak nao tong ten; hơmâo lu hơdră bruă ngă hrŏm lăp djơ̆, sit nik amăng djop mơta bruă kiăng pok pơhai tŭ yua hơdôm tơlơi ƀuăn amăng ngă tui tơlơi rô nao rai ngă hrŏm djop mơta hơmâo khua mua dua bơnah tŭ ư amăng tal rai čuă mơng Khua mir sir Mi Joe Biden pơ Việt Nam laih rơgao.

Pơpŭ bơni Khua ding jum Tô Lâm hơmâo pioh hrơi mông tŭ jum, Khua sang anih jưh pơ ala dêh čar Mi Marc Knapper pơsit tong, Sang anih jưh pơ ala dêh čar Mi amra tŏ tui gum hrŏm, mă bruă kjăp hăng hơdôm anom bruă bơdjơ̆ nao mơng Ding jum kông ang Việt Nam kiăng pok pơhai brơi sit nik hăng tŭ yua hơdôm boh tơhnal ngă hrŏm dua bơnah đing nao, sit biă ñu lĕ hơdôm boh tơhnal ngă hrŏm hơmâo khua mua tŭ ư amăng hơdôm tơlơi pơkôl ngă hrŏm sui thun djop mơta kơplah wah Việt Nam -Mi yua kơ tơlơi rơnuk rơnua, ngă hrŏm hăng pơđĭ kyar hơđong kjăp.