Tơdơi kơ hmư̆ tơlơi pơhing mơ̆ng sang hră lăi pơthâo, Khua ding jum Pơtô hăng Pơjuâ̆t ơi Nguyễn Kim Sơn rơkâo: Sang hră Đại học Tây Nguyên kiăng mơneč mă anŏ gêh găl pơkra hơdră, bruă pơtô hrăm pơ anăp adih. Sang hră kiăng đing nao 2 khul bruă tui tơlơi kiăng amăng bruă pơtô hrăm, pơđĭ tui boh thâo ia rơgơi phrâo hăng khul gah boh thâo ană mơnuih mơnam, bơwih brơi bruă wai lăng mơnuih mơnam, git gai wai lăng mơnuih mơnam, tơlơi đăo, tơlơi yang rơbang, djuai ania, gru grua hiam brơi kơ kual Dap Kơdư.

Hrom hăng anun, sang hră pơtrut bruă kơsem min boh thâo ia rơgơi phrâo; hơdră pơtô hrăm khom pơhưč ƀing čơđai sang hră gưl prong, pơđĭ tui mrô  čơđai sang hră mut hrăm, pơtô hơmâo hơdră anăp nao tong ten, phrâo hloh; hơmâo hơdră pơtrut pơđĭ kyar khua mua, nai pơtô thâo rơgơi, pơhưč mơnuih mă bruă tŭ yua hloh.