Ƀơi mông bưp, Khua git gai Ping gah ơi Tô Lâm pơsit Việt Nam lêng kơ lăng yôm tơlơi rô nao rai hăng Kyrgyzstan. Khua git gai Ping gah lăi, rơbêh kơ klâo pluh thun, tơlơi rô nao rai kơđi čar - pơtom hiăp hơmâo kjăp tui, ngă hrŏm bơwih ƀong sĭ mơdrô kơplah wah dua bơnah hơmâo lu tơlơi đĭ kyar, samơ̆ dŏ lu tơlơi aka ƀu hơmâo mă yua, pơtrut abih ôh, čang rơmang kiăng pơđĭ hloh tơlơi ngă hrŏm dua bơnah amăng djŏp bruă kiăo tui hơdôm tơlơi kĭ pơkôl dua bơnah, mă yua klă hơdôm tơlơi gêh gal mơ̆ng Hră kĭ pơkôl sĭ mơdrô rơngai plah wah Việt Nam hăng Khul bơwih ƀong ASIA-Mi Kô̆; dua bơnah dưi pơtrut tơlơi gơgrong bruă pơtruh nao rai kual Tong krah ASIA hăng ASEAN.

Hrơi blan pơ anăp, dua čô khua gum lăi, dua boh dêh čar hơmâo lu tơlơi gêh gal pơtrut tui tơlơi ngă hrŏm kiăo tui pran jua ngă bruă klă kơ dua bơnah, kiăng jơnum ƀơi djŏp gưl, ƀơi abih bang mông jơnum dua bơnah hăng lu bơnah, Ping gah, Khua mua pơ ala mơnuih ƀôn sang kiăng đăo kơnang nao rai kjăp hloh; pơtrut lu tơlơi ngă hrŏm kơplah wah ding jum anom bruă, tơring čar plơi pla.