Pơ ala kơ ƀing khua git gai Ping gah, Kơnuk kơna ƀơk Miđai Mă bruă dăp tal Sa kơ Ping gah gong gai hăng mơnuih ƀôn sang plơi prong Phước Long, Khua git gai Ping gah dêh čar ta ơi Tô Lâm pơdah pran jua hơdor tơngia dơlăm pran jua mơ̆ng ƀing Tơhan sông kơtang pơsăn drơi, neh wa, ƀing apăn bruă tơhan, ling tơhan hmâo kơdŏng blah, pơsăn drơi kơ kual lŏn “Kual Ngŏ tơnap tap mơ̆ Sông kơtang”, brơi kơ bruă tlaih rơngai – pơlir hơbit lŏn ia. Khua git gai Ping gah bơni hăng pơsit yôm hơdôm bôh than tơring čar Bình Phước dưi ngă amăng giăm truh 50 thun tlaih rơngai.

Mơ̆ng sa anih anom hmâo anom mă bruă ƀu klă, rơnoh bơwih ƀong anet, tơlơi hơdip mơda mơ̆ng mơnuih ƀôn sang tơnap tap, Bình Phước hmâo hăng glăk pơplih rim hrơi pioh jing “pran pơtrut pơđĭ kyar” mơ̆ng đơ đam kual. Khua git gai Ping gah rơkâo tơring čar ngă tui kơtang dong bruă gơgrong, bôh thâo, pran hrưn đĭ, pran jua hăng pran kơtang mơ̆ng gum hrŏm hơbit djuai ania pioh pok tơbiă, iâo pơhrui hăng mă yua ba glăi bôh tơhnal djop ngăn rơnoh amăng mơnuih mơnam; pơtrut tañ pơplih phrâo, pơplih mrô pioh pơđĭ kyar bruă pơkra rai gơnam phrâo; kơtưn tô nao rai kual hluai tui pơđĭ kyar anom mă yua phun; pơjing lu bruă mă hăng đĭ prăk pơhrui ngăn drăp; pơđĭ dlông anô̆ klă tơlơi hơdip mơda kơ mơnuih ƀôn sang./.