Tô̆ tui hơdôm bruă mă amăng rơwang nao čuă gưl kơnuk kơna pơ̆ dêh čar Indonesia hăng čuă Grŭp čih pioh kual ASEAN, mơguah tom brơi (10/3) Khua git gai Ping gah dêh čar ơi Tô Lâm nao pơhmư̆ hăng pơhiăp amăng mông bơkơtuai hăng anom bơwih ƀong gưl dlông ƀrô djơ̆ tal hơdor glăi 70 thun tơlơi rô nao rai pơtom hiăp Việt Nam hăng Indonesia hăng anăn ñu “Việt Nam hăng Indonesia: Gum hrŏm yua kơ tơlơi pơplih phrâo hăng pơđĭ kyar”.

Pơhiăp amăng mông bơkơtuai, Khua git gai Ping gah dêh čar ơi Tô Lâm pơsit yôm hơdôm bruă mă gum hrŏm tuh pơplai, sĭ mơdrô ba glăi bôh tơhnal kơplah wah Việt Nam hăng Indonesia hơdôm hrơi rơgao hăng čang rơmang čơkă mă dong tơlơi đăo kơnang, gum hrŏm, djru ba mơ̆ng Gong gai, hơdôm ƀirô, khul bơwih ƀong Indonesia hơdôm hrơi pơ̆ anăp. Khua git gai Ping gah dêh čar rơkâo, ƀing tuh pơplai dua bôh dêh čar amra kơsem min, pok prong tuh pơplai amăng hơdôm bruă, mơta bruă kah hăng kơsem min bôh thâo măi mok, pơplih phrâo pơčeh phrâo, kơsem min hăng pơđĭ kyar, pơđĭ kyar bruă măi mok chip pơđoh apui, bôh thâo pơčeh phrâo (AI), internet djop mơta ra mơnong (IOT); apui yua phrâo (kah hăng hydrogen), apui pơkra glăi; prăk kak, anom phun prăk kak; hơdră mă yua sinh học, bruă ia jrao... Việt Nam jai hrơi jai pơtŏng sit bruă mă pơhrua hrŏm yôm phăn amăng hơdôm hơdră tuh pơplai phrâo mơ̆ng rŏng lŏn tơnah, biă ñu amăng hơdôm bruă điện tử, bôh thâo phrâo, hơdră mă yua măi mok, pơplih phrâo pơčeh phrâo, chip pơđoh apui, bơwih ƀong mrô, bơwih ƀong mơtah./.