Amăng hrơi blan rơgao, Khul hơdôm anom bruă hơmâo pel ĕp, abih bang kiăng sem lăng pơhrua amăng hơdôm črăn hră mơ-it nao Jơnum tal XIV mơng Ping gah, amăng anun hơmâo boh tơhnal kơ hơnong pơkă pơđĭ kyar rơwang thun 2026-2030 anăp nao 2 mrô; hrŏm hăng anun lĕ sa, dua boh tơhnal yôm phăn pơkŏn kơ bruă wai pơgang rơnuk rơnua, hơđong, pơtom hiăp; hơdôm bruă bơdjơ̆ nao tơlơi phiăn hăng bruă pơgăn hưp ƀong kông ngăn. Đĭ pơhiăp pơđut mông jơnum, Khua git gai Ping gah dêh čar ơi Tô Lâm tŭ ư hăng tơlơi rơkâo mơng Khul hơdôm anom bruă, laih dong pơtă abih bang tŏ tui tŭ mă tơlơi pơgôp hiăp amăng jơnum kiăng čih pơkra glăi, pơhrua hơdôm črăn lăi pơthâo tui jơlan gah hơbot.

Khua git gai Ping gah rơkâo, hră lăi pơthâo kiăng čih tui jơlan gah ngă bruă hăng pok pơhai mơtăm tui sit nik kiăng abih bang mơnuih, ƀing apăn bruă Ping gah ƀuh rơđah hơnong pơkă ba tơbiă, ngă atur hăng dưi ngă tui. Khua git gai Ping gah ăt rơkâo, hơdôm črăn hră lăi pơthâo kiăng lăng nao tơpă, hơmâo hơdră bruă lăp djơ̆ kiăng pok pơhai, anăm pơpŭ hlao đơi hơdôm tơlơi dưi samơ̆ anăm hŭi đơi ôh.