Pơhiăp git gai jơnum, Khua git gai ping gah ơi Tô Lâm Khua anom bruă git gai mơ̆ng gơnong dlông ping gah kơ bruă mă, pơgăn tơlơi soh ƀong kông ngăn, phăk phai soh sat thun 2024 hăng bruă mă amăng anom bruă pơgăn ƀong kông ngăn yua ping gah dêh čar git gai, anăp nao bruă mă ngă djơ̆ tơlơi pơkă, djơ̆ tơlơi pơtrun ƀu hơmâo kual kom ôh suh mă ƀing ngă soh ƀong kông ngăn, ƀu hơmâo hlơi dưi pơgang brơi ngă tơdu tơlơi soh ôh, wơ̆t hăng pô anun hlơi, ngă bruă hơgĕt hai, kiăng ngă kơjăp glăi tơlơi đăo kơnang mơ̆ng mơnuih ƀôn sang hăng ping gah, dưi hơmâo gơyut gơyâo jar kmar bơni biă mă.

Tŭ ư hrŏm hăng bruă mă amăng thun 2025, Khua git gai ping gah hơmâo rơkâo, pơsir mơtam hơdôm bruă ngă dŏ tơdu laih anun pơčrâo rơđah hơdôm tơlơi kiăng ngă amăng hră lăi pơthâo pioh pơčrong sai amăng mông jơnum. Lăi pơtong thun anai amra hơmâo lu tơlơi jơnum prong lăp hơdor pioh ƀơi dêh čar, mơ̆ng ping gah hăng kơnuk kơna ta, hơmâo lu jơlan hơdră phrâo, kiăng ngă bruă tong ten hloh. Yua kơ anun, đơ đam gah anom bruă pơgăn ƀong kông ngăn yua ping gah git gai hăng djop anom bruă ƀơi gưl tơring čar kiăng kiăo tui tong ten, thâo rơđah bruă pơtrun hăng lăi pơthâo boh tơhnal kơ ping gah laih anun kơnuk kơna amăng bruă mă pơgăn ƀong kông ngăn.