Amăng mông bưp, Khua git gai Ping gah ơi Tô Lâm lăi pơtong, bruă dêh čar Prang lĕ ding kơna kual EU blung a jing bơnah ngă hrŏm yôm phăn djop mơta mơng Việt Nam, pơdah tơlơi đăo gơnang hăng brơi ƀuh Việt Nam lăng yôm hăng čang rơmang ngă dơlăm ƀiă dong tơlơi rô nao rai giang mah, ngă hrŏm djop mơta hăng Prang; rơkâo dêh čar Prang, hăng tơlơi gơgrong lĕ ding kơna phun hăng hơmâo boh pơhiăp amăng kual EU, pơtrut ƀiă dong amăng tơlơi rô nao rai Việt Nam-EU kiăng pơgôp pơgang rơnuk rơnua, hơđong hăng pơđĭ kyar amăng kual hăng rŏng lŏn tơnah.

Khua git gai Ping gah ơi Tô Lâm hăng Khua anih jưh Prang tŭ ư tŏ tui kơtưn ngă hrŏm amăng jơnum djop bơnah hăng khul grup jar kmar, pơtrut ngă hrŏm djop bơnah, pơpŭ tơlơi phiăn jar kmar, pơsir hĭ hơdôm tơlơi lông amăng rŏng lŏn tơnah. Kơ bruă ƀơi kual ia rơsĭ Ngŏ, Khua anih jưh Prang lăi pơtong, Prang hăng EU dong yua tơlơi pơmĭn mơng Việt Nam hăng kual ASEAN kơ bruă pơsir hĭ hơdôm bruă bơrơsua hăng hơdôm hơdră rơnuk rơnua hluai tui tơlơi phiăn jar kmar, pơgôp tŏ tui pơhlôm rơnuk rơnua, hơđong, rơngai hăng rơhuông adai laih dong kual ia rơsĭ amăng kual.