Khua git gai Ping gah dêh čar ơi Tô Lâm rơkâo, Ping gah Gong gai dêh čar črâo ba tañ ngă giong pel ĕp kông ngăn hrŏm mơ̆ng hơdôm bôh ƀirô, anom bruă, tơring čar, ƀôn prong amăng đơ đam dêh čar pioh hmâo jơlan gah wai lăng, pơpha, mă yua tơdơi kơ dưm dăp, ngă rơbô̆t jơlan mă bruă hăng anom mă bruă čar hơdôm gưl, pơhlôm ba glăi bôh tơhnal, ƀu pioh rơngiă đôč, khưi khai. Ngă giong pơsir amăng thun 2025 mơtăm hăng hơdôm anih anom sang lŏn mă bruă hrŏm ƀu mă yua, mă yua ƀu ba glăi bôh tơhnal.

Pran jua lĕ khom pơplih phrâo rơđah hloh dong amăng bruă pơgang, pơgăn ngă khưi khai, biă ñu đing nao pơsir pơđut hơdôm ring bruă, rơwang bruă kaih rơnoh, djru iâo pơhrui, mă yua ba glăi bôh tơhnal hơdôm ngăn rơnoh kơ tơhnal pơkă pơđĭ kyar bơwih ƀong rơbêh kơ 8% amăng thun 2025 hăng 2 mrô amăng hơdôm thun tô̆ tui. Khua git gai Ping gah dêh čar ơi Tô Lâm ăt rơkâo mơn, pơphun klah čun bruă pơgang, pơgăn hưp ƀong kông ngăn, ngă khưi khai, soh tơlơi phiăn mơ̆ng Rơwang bruă Jơnum tal 13. Ƀơi anăp, amăng thun 2025 khom pơplih phrâo djop hơdôm hơdră pơtrun, hơdră bruă mơ̆ng Ping gah kơ pơgang, pơgăn hưp ƀong kông ngăn, ngă khưi khai, soh tơlơi phiăn hmâo lăi nao amăng tal Jơnum 13./.