Mơguah lơ 30/12, Khua git gai Ping gah dêh čar ta ơi Tô Lâm nao pơhmư̆ hăng git gai mông bưp ƀô̆ mơta khua pơ ala thâo hră, mơnuih kơsem min bôh thâo phrâo đơ đam dêh čar. Ƀing khua pơ ala lăi pơthâo glăi hơdôm bôh tơhnal ba glăi amăng kơsem min, mă yua, pơtô pơhrăm mơ̆ng sa dua mơta bruă yôm phăn kah hăng bruă ia jrao, bruă đang hmua, hơdră phrâo măi mok...; bruă ngă pơhrưč, tum pơƀut hăng ngă tui bruă mă mơ̆ng mơnuih thâo hră, mơnuih kơsem min hăng ba tơbiă, rơkâo đĭ pioh kơ Ping gah hăng Kơnuk kơna.

Pơhiăp amăng mông bưp ƀô̆ mơta, Khua git gai Ping gah dêh čar pơtŏng sit thâo hră jing khul mơnuih pơ ala kơ bôh thâo ia rơgơi, thâo bruă mơ̆ng mơnuih ƀôn sang hăng djuai ania, jing sa amăng hơdôm ngăn rơnoh hăng pran pơtrut yôm phăn hloh ba glăi tơlơi pơplih phrâo hăng tơlơi pơđĭ kyar kơ lŏn ia. Rơkâo gưl Ping gah, gong gai hơdôm gưl, khom pơplih phrâo kơtang bruă pơtô pơhrăm, ruah mă, yua yôm tơlơi thâo rơgơi, mơnuih kơsem min bôh thâo phrâo pioh pơtrut pơdŏng hăng ngă tui bruă mơ̆ng ƀing thâo hră djơ̆ tui tơlơi rơkâo pơđĭ kyar lŏn ia tañ hăng kơjăp sui thun. Khua git gai Ping gah dêh čar rơkâo, khul mơnuih thâo hră, mơnuih kơsem min bôh thâo phrâo amăng đơ đam dêh čar tañ hrưn đĭ truh thun 2030 khom hmâo 100 mơta tơlơi pơčeh phrâo, pơčeh pơkra, ring bruă kơsem min amăng hră dưm dăp mơ̆ng bôh thâo phrâo kơsem min rŏng lŏn tơnah; gơnam kơsem min, hơdră phrâo măi mok, tơlơi čih bôh pia, hơdră hmâo tơhnal dlông. Truh thun 2045, mơnuih thâo hră Việt Nam ba jơlan hlâo kual, gah tốp phun rŏng lŏn tơnah./.