Tŭ ư hăng tơlơi jak iâu mơng Khua git gai Ping gah Cộng sản Việt Nam ơi Tô Lâm, Khua mir sir ơi Lương Cường, hrơi anai (14/4), Khua git gai Ping gah Cộng sản Khač, Khua mir sir Khač ơi Tập Cận Bình pơphun rai čuă gưl Kơnuk kơna pơ dêh čar ta amăng 2 hrơi kiăng tŏ tui hơkrŭ giang mah gru grua “bơnah ngă gŏp rah, hăng bơnah adơi ayong rah” kơplah wah Khač-Việt Nam hăng kơtưn đăo gơnang tơdruă, ngă dơlăm tui bruă ngă hrŏm sit nik, pơtrut pơjing bơnah djru nao rai kơñ pơgi kơplah wah Việt Nam-Khač jai dơlăm tui, sit nik. Anai lĕ tal hyu čuă dêh čar tač rơngia blung a amăng thun 2025, tal rai čuă Việt Nam tal pă mơng ơi Tập Cận Bình lơm ñu đĭ ngă khua apăn bruă dêh čar Khač hăng anai lĕ tal dua amăng sa rơwang ngă bruă.

Kơ-iăng Khua dêh čar, Khua ding jum pơtom hiăp dêh čar ơi Bùi Thanh Sơn brơi thâo, him lăng amăng tal rai čuă anai, Khua git gai Ping gah, Khua mir sir ơi Tập Cận Bình hơmâo mông bưp gưl khua mua pơprong hăng Khua git gai Ping gah ơi Tô Lâm, Khua mir sir ơi Lương Cường, laih dong bưp Khua dêh čar ơi Phạm Minh Chính hăng Khua git gai pơ ala mơnuih ƀôn sang dêh čar ơi Trần Thanh Mẫn kiăng pơčrông sa hơdôm hơdră bruă, jơlan gah pơprong kiăng pơtrut tơlơi rô nao rai dua bơnah amăng djop mơta bruă.