Jơnum pơlir hăng giăm 35.000 anih lăng nao rai đơ đam dêh čar. Nao jơnum hăng đĭ pơhiăp git gai mông jơnum, Khua git gai Ping gah, Khua mir sir ơi Tô Lâm lăi pơtong, tơlơi pơtrun mrô 10 pơdah tơlơi pơplih amăng tơlơi pơmĭn pơđĭ kyar, ƀu djơ̆ kơnong pok blah amăng čơkă mă prăk tuh pơ alin đôč ôh mơ̆ ăt gơgrong ruah mă hăng mă yua ngăn rơnoh mơng tač rơngiao kiăng pơjing pran bơkơtưn mơng dêh čar. Tơdơi kơ lăi nao tơpă anŏ aka klă amăng bruă pơhưč FDI amăng hrơi blan rơgao, Khua git gai Ping gah, Khua mir sir ơi Tô Lâm pơsit tong, tơlơi pơtrun mrô 10 ba tơbiă hơnong pơkă hăng tơlơi rơkâo prong ƀiă: pơđĭ kyar bơwih ƀong huă hơmâo prăk tuh pơ alin mơng tač rơngiao pơlir hăng hrưn đĭ klă pran gơgrong mă, thâo bơwih ƀong, mă yua boh thâo phrâo hăng pran bơkơtưn amăng bơwih ƀong huă; gir run truh thun 2030 Việt Nam dong amăng grup ba jơlan hlâo kual ASEAN kơ bruă tuh pơ alin bơwih ƀong huă, pran bơkơtưn, pơplih pơčeh phrâo, klă amăng bruă bơwih brơi bruă dêh čar hăng tañ čơkă mă hơdôm akŏ bruă tuh pơ alin mơng tač rơngiao klă hloh.

Khua git gai Ping gah, khua mir sir ơi Tô Lâm lăi pơtong, gir run pơsir hĭ hơdôm bruă luk puk, ngă hră pơ-ar lu đơi. Anăm brơi anom bruă tuh pơ alin găn rơgao lu anih anom, rơngiă hrơi mông hăng prăk kak či pok pơhai sa akŏ bruă djơ̆ tơlơi phiăn. Tơlơi pơtrun mrô 10 hơmâo pơsit 6 tơlơi git gai, 6 bruă pơplih prong kơ tơlơi pơmĭn pơđĭ kyar hăng ba tơbiă truh thun 2030 pơhưč mơng 200-300 klai đôlar Mi prăk tuh pơ alin mơng tač rơngiao. Anăp nao truh thun 2045, Việt nam jing anih pơkra pơjing, bơwih bơwang, pơplih pơčeh phrâo hăng git gai kual mơng hơdôm grup bơwih ƀong pơlir lu dêh čar.