Khua git gai Ping gah, Khua mir sir ơi Tô Lâm pơsit tong Việt Nam lêng kơ lăng yôm tơlơi rô nao rai giang mah gru grua hăng ngă hrŏm yôm phăn djop mơta hăng dêh čar Nga, lăng Nga lĕ sa amăng hơdôm bơnah ngă hrŏm prong hloh amăng hơdră bruă pơtom hiăp mơng Việt Nam. Dêh čar Việt Nam lêng kơ hơdor tơngia hăng lăng yôm tơlơi dong yua, djru ba prong prin, abih pran jua mơng mơnuih ƀôn sang Liên Xô đưm hlâo hăng mơnuih ƀôn sang Nga ră anai hăng bruă pơklaih rơngai lŏn ia, pơlir dêh čar jing sa, kah hăng bruă pơjing hăng wai pơgang lŏn ia.

Khua git gai Ping gah, Khua mir sir lăi pơtong tơlơi rô nao rai Việt Nam-Nga hơmâo găn rơgao lu tơlơi lông hăng hơdôm tơlơi pơplih amăng rŏng lŏn tơnah, jing kông ngăn yôm phăn kơplah wah dua boh dêh čar. Việt Nam čang rơmang dua bơnah tŏ tui djă pioh hơdôm gru grua atur phun hiam klă, laih dong pơhrua hơdôm tơhnal ngă hrŏm phrâo, lăp djơ̆ tơlơi rơkâo pơđĭ kyar amăng rơwang phrâo ră anai.