Amăng mông mă bruă, Khua git gai Ping gah, Khua mir sir ơi Tô Lâm lăi pơtong, bruă lăng glăi ngă tui tơlơi pơtrun mrô 26 kiăng tong ten, djop mơta boh than ba glăi, lăng nao tong ten anŏ aka ƀu klă hăng tơlơi ba truh; laih dong hơmâo hơdôm tơlơi pơhrăm glăi, ngă atur phun kiăng hơmâo hơdôm tơlơi črâo trun, hơdră ruah mơnuih apăn bruă amăng rơwang phrâo. Khua git gai Ping gah, Khua mir sir rơkâo bruă lăng glăi kiăng kiăo tui tơlơi sit nik, sit biă ñu hơdôm bruă phrâo ƀuh amăng pok pơhai anih anom mă bruă, kah gưl, jao tơlơi glăm ba hăng pok pơhai gong gai ƀon lan.

Boh tơhnal lăng glăi kiăng ngă rơđah hơdôm tơlơi gun, hơdôm tơlơi pơkă aka ƀu djơ̆ kiăng pơplih pơkra, pơhrua phrâo. Laih dong, kiăng tŏ tui pơplih kơtang amăng bruă ruah mơnuih apăn bruă tui jơlan ruah lăp djơ̆ mơnuih, jao djơ̆ bruă, sem lăng mơnuih apăn bruă tui djơ̆ bruă jao; đing nao pơjing mơnuih apăn bruă ngă tui klă bruă kơđi čar, gru hơdip hiam, thâo ngă bruă sit nik, lăp djơ̆ tơlơi rơkâo pơđĭ kyar lŏn ia amăng rơwang phrâo.