Pơhiăp nao rai jê̆ giăm hăng ƀing đah kơmơi pơ ala mơnuih ƀon sang dêh čar, Khua git gai Ping gah ơi Nguyễn Phú Trọng lăi rơđah, bruă mă pơplih phrâo, mă yua boh thâo măi mok phrâo, akŏ pơdong hăng pơgang ba lŏn ia amăng hrơi mông phrâo jing bruă prong biă mă hăng abih bang Ping gah, abih bang mơnuih ƀon sang, abih bang anom bruă kơđi čar mơng dêh čar ta, amăng anun hơmâo tơlơi gơgrong bruă prong mơng Khua mua pơ ala mơnuih ƀon sang dêh čar, ƀing khua đah kơmơi pơ ala mơnuih ƀon sang dêh čar. hăng pran jua anai, Khua git gai Ping gah ơi Nguyễn Phú trọng pơtă hlâo, hrơi blan pơ anăp, ƀing đah kơmơi kiăng pơtrut tui gru grua sông kơtang, hing ang mơng ƀing đah kơmơi Việt Nam, abih pran jua mă bruă yua kơ tơlơi klă hiam mơng lŏn ia, djuai ania, yua kơ tơlơi hơdip yâo mơ-ak mơng Mơnuih ƀon sang; ngă klă hloh dong tơlơi gơgrong bruă jing mơnuih pơ ala brơi Mơnuih ƀon sang; pơtrut tui tơlơi gơgrong bruă amăng bruă čih pơkra, ngă pơgiong tơlơi phiăn (amăng anun hơmâo tơlơi phiăn, hơdră djru ngă bơkơnar đah kơmơi đah rơkơi), krăp lăng klă hăng pơsit hơdôm bruă prong mơng lŏn ia ta kiăo tui bruă mă mơng Ƀirô khua pơ ala mơnuih ƀon sang dêh čar.