Mơguah lơ 7/4, ƀơi sang bruă Ping gah, Khua git gai Ping gah ơi Nguyễn Phú Trọng git gai mông jơnum mơng Ding jum kơđi čar, Khul khua gum bruă Ping gah pơgôp hiăp kơ Kơčăo bruă “Klah čun 15 thun ngă tui Tơlơi pơtrun mrô 27 mơng Khul khua apăn bruă git gai Ping gah dêh čar tal 10 kơ akŏ pơjing mơnuih mă bruă rơgơi amăng rơnuk pơđĭ kyar boh thâo măi mok, pơplih phrâo lŏn ia”; pơhmư̆ Jơnum min Pel ĕp kơđi tơlơi Ping gah dêh čar lăi pơthâo hơdôm kơ hơdôm grup hơduah ĕp kơđi mơng Ding jum kơđi čar, Khul khua gum bruă Ping gah thun 2022 hăng ba tơbiă Jơlan hơdră pel ĕp kơđi tơlơi mơng Ding jum kơđi čar, Khul khua gum bruă Ping gah thun 2023.

Ding jum kơđi čar lăi rơđah: tơlơi gơgrong bruă mơng Ping gah, Kơnuk kơna, mơng anom bruă kơđi čar hăng abih bang mơnuih khŏm hơmâo mơnuih thâo hră lu, rơgơi, dưm dăp bruă mă lăp djơ̆ wơ̆t hăng pơtrut tui tơlơi gơgrong bruă, tơlơi rơgơi amăng bruă ngă djŏp tơlơi hơmâo jao, pơđĭ kyar bơwih ƀong huă - mơnuih mơnam. Bơdjơ̆ nao Jơlan hơdră pel ĕp kơđi tơlơi mơng Ding jum kơđi čar, Khul khua gum bruă ping gah thun 2023, Ding jum kơđi čar, Khul khua gum bruă hơmâo pơsit akŏ pơdong 5 grup hyu hơduah ĕp sem lăng kơđi tơlơi Ding jum kơđi čar, 5 grup hyu hơduah ĕp gah Khul khua gum bruă Ping gah đah mơng hyu pel ĕp sem lăng 30 boh khul grup Pinh gah gơnong dlông.