Pơhiăp amăng mông jơnum, Khua git gai ping gah ơi Nguyễn Phú Trọng lăi, găn rơgao lu thun gru phun dêh čar hăng djuai ania, mơnuih thâo hră, ƀing rơgơi kơhnâo Việt Nam ăt djă bong kjăp pran jua khăp kơ lŏn ia, pran jua pơ-ư ang djuai ania, hăng djă pioh tơlơi gơgrong yôm amăng bruă mă man pơdong hăng pơgang lŏn ia. Khua git gai ping gah ơi Nguyễn Phú Trọng pơdah pran jua kiăng pơ anăp anai, Khul pơlir hơbit djop Khul Boh thâo ia rơgơi hăng tơlơi kơhnâo Việt Nam, mơnuih thâo hră, ƀing kơhnăk hăng boh thâo ia rơgơi tơlơi pơhing Việt Nam kiăng prăp lui hăng ngă klă hloh dơ̆ng bruă mă lăi pơthâo kơ ping gah hăng kơnuk kơna.

Rơđah biă mă ñu: ngă klă hloh bruă lăi pơthâo, drơ̆ng glăi pơđing hmư̆ sit čih pơkra tơlơi phiăn, jơlan hơdră, djop mơta hră pơar tơlơi phiăn hăng tơhnal pơtrun tum teč, pơhưč lu mơnuih ngă hrom, mă yua, djru ba hăng pơpŭ kơ mơnuih thâo hră rơgơi kơhnâo, kiăng akŏ pơjing khul mơnuih thâo hră lu na nao ƀu pơdơi ôh, đĭ mrô, prong tui hăng tŭ yua.