Tui hăng hră lăi pơthâo, hơdôm thun rơgao, tơring čar Gia Lai hơmâo hơneč mă anŏ gêh găl, anŏ  hơmâo mơ̆ng hlâo kơ boh tơhnal yom, bruă ngă hlom bom, djă pioh bong kơjăp anih anom phun kơ bruă kơđi čar, pơgang lŏn ia, rơnuk rơnua dêh čar; tơlơi pơblih hơdră bơwih ƀong huă, pơblih pơjeh djuai phun pla, hlô mơnong rông djơ̆ lăp, rơnoh pơđĭ kyar pơkă dưm dưm 6,21% sa thun, hơnơ̆ng bơwih ƀong huă đĭ giăm 2 wơ̆t pơkă hăng akŏ rơwang bruă ping gah.

Tơdơi kơ pơčrâo rơđah anŏ gêh găl hơmâo phara ƀơi tơring čar, ơi Tô Lâm Khua git gai ping gah lăi rơđah tơlơi kiăng mơ̆ng ping gah, Kơnuk kơna kơ bruă pơđĭ kyar hăng bruă mă pioh kơ Gia Lai khom ngă tui dơ̆ng sit mơ̆n ƀu ƀiă ôh. Khua git gai ping gah rơkâo Gia Lai jŭ yap glăi, tơhnal pơkă, hơdră mă bruă, pơsir hơdôm tơlơi dŏ gun hăng anŏ kơđông amăng bruă pơđĭ kyar, kơtưn gir run hloh ngă giong tơhnal pơkă, bruă mă mơ̆ Hră pơtrun mơ̆ng Ping gah jơnum ruah khua tal XVI pơkă. Pơtum nao kơ bruă git gai, pơčrâo  bruă prăp lui anŏ gêh găl kiăng jơnum ruah khua ping gah djop gưl tŭ yua truh kih hăng jơnum ruah khua ping gah tơring čar tal XVII. Ƀrô djơ̆ tal anai, Khua git gai ping gah ơi Tô Lâm hơmâo jao ring bruă sang ia jrao să Glar, tơring glông Đak Đoa abih 5 klai prăk man pơdong.