Pơhiăp ƀơi mông ngă bruă, Khua git gai Ping gah ơi Tô Lâm pơsit, kiăng tơlơi bơwih ƀong mơnuih mơnam đĭ kyar hơđong kjăp kiăng hơmâo tơlơi gum djru mơ̆ng abih anom bruă čar, hơmâo lu khul grup bơwih ƀong hăng mơnuih ƀôn sang, kiăng dưi ngă tơlơi anai jing tơlơi yôm biă mă mơtăm lĕ ngă giong tơlơi phiăn kơ hơdră ngă pơhưč tuh pơ alin hăng đĭ kyar bơwih ƀong.

Tui hăng Khua git gai Ping gah tơlơi kiăng ngă hlao mơtăm lĕ pơplih anih tuh pơ alin sĭ mơdrô, gir hrŏ trun aset biă mă ñu 30% prăk apah bruă sĭ mơdrô, prăk ngă hră pơ-ar hăng lui hĭ aset biă ñu 30% tơlơi pơkôl pơkă sĭ mơdrô ƀu kiăng đơi; gir amăng 2-3 thun pơ anăp anih anom tuh pơ alin sĭ mơdrô mơ̆ng dêh čar ta dong mrô 3 ƀơi kual ASEAN. Rơngiao kơ anun, kiăng khin ngă bruă, mă yua boh thâo mrô, pơčeh phrâo, hơmâo hơdră djru phara kơ prăk kăk; kiăng čih pơkra không čih tơlơi phiăn phara hơjăn kơ hơdôm kual bơwih ƀong phara hơjăn ƀơi hơdôm boh ƀôn prong; hơmâo hơdră djru phara amăng bruă pơsir hĭ bơrơsua bơwih ƀong sĭ mơdrô; hơmâo hơdră pơphô bruă gah lŏn tơnah, sang dŏ pơtrut akŏ pơjing plơi prong jing tơlơi gêh gal đĭ kyar mơ̆ng lŏn ia ta.