Ƀơi mông tŭ jum, Khua git gai ping gah ơi Tô Lâm hok mơak ƀuh pơđĭ kyar tơlơi đăo kơnang nao rai kơđi čar Việt Nam-New Zealand, jing atur pioh kơ dua bơnah dêh čar kơtưn ngă hrŏm hlom bom djop bruă. Khua git gai ping gah lăng yom boh tơhnal bơkơtuai mơ̆ng dua čô khua dêh čar, biă mă ñu hơmâo hră pôr pơthâo hrŏm, pơđĭ tui tơlơi rô nao rai Việt Nam-New Zealand jing bơnah ngă hrŏm kơjăp hloh, pơdah rai anŏ pơđĭ kyar kơtang amăng rơnuk phrâo.

Dua čô khua ăt tŭ ư anăp ngă bruă pơđĭ kyar rô nao rai amăng črăn bruă phrâo; đăo kơnang tong ten amăng bruă ngă hrŏm dua bơnah hlom bom phrâo ba glăi boh tŭ yua hrŏm prong hloh, djru amăng bruă pơsir tơlơi rơnuk rơnua, mơak hlak pơđĭ kyar amăng kual laih anun ƀơi rŏn lŏn tơnah.