Pơhiăp amăng mông jơnum lăi pơthâo akŏ bruă, Kơ-iăng Khua dêh čar, ơi Trần Hồng Hà brơi thâo, hră pơkă hnong tơring čar Phú Yên dưi kač pơkra hăng tơlơi pơblih phrâo kơtang, lăng nao pơ anăp adih sui thun, tui hăng anŏ gêh găl phara hơjăn dưi hơmâo kông ngăn lŏn mơnai glai klô hăng gru grua hiam. Hră čih pơkra pơkă hnong anai kah hăng hră pơkă brơi abih bang, anŏ gơgrong yôm ngă anih pơkă lăng pioh pơtrut pơđĭ kyar pơlir hơbit tong ten hăng djop tơring čar gah dơnung Tong krah hăng kual Dap Kơdư. Kiăng dưi ngă bruă anai, Kơ-iăng Khua dêh čar, ơi Trần Hồng Hà rơkâo tơring čar Phú Yên kiăng tŭ mă tơlơi hrăm pơđĭ kyar amăng hơdôm tơring čar kual ieo gah, ăt pơblih phrâo pơčeh rai ĕp jơlan hơdră nao phara hơjăn kơ anŏ pơđĭ kyar tuh pơ alin, găn rơgao tơlơi thâo thăi. Anăp pơđĭ kyar tơring čar Phú Yên 2 arăt jơlan prong, 3 tơmeh phun, 4 atur kjăp, 5 bruă mă yôm kiăng ngă tui truh thun 2030, Phú Yên amra jing tơring čar pơđĭ kyar hiam hloh hăng hơđong.

Mă bruă hăng khua mua tơring čar Phú Yên, Khua git gai pơ ala mơnuih ƀôn sang dêh čar ơi Vương Đình Huệ rơkâo ping gah, gong gai kơnuk kơna hăng mơnuih ƀôn sang tơring čar Phú Yên pok pơhai tŭ yua boh than ngă tui hră pơtrun mơ̆ng ping gah dêh čar, hră pơtrun mơ̆ng khua mua pơ ala mơnuih ƀôn sang, kơnuk kơna dêh čar kiăng djă bong rơnoh pơđĭ kyar, pơsir hĭ anŏ gun amăng thun 2024 hăng abih sa rơwang bruă; tơring čar ăt hơduah ĕp anŏ phara pioh pơđĭ kyar, anun lĕ bruă ngă phara hơjăn gêh găl kông ngă lŏn mơnai glai klô, gru grua hiam.

Hlâo kơ anun, ơi Vương Đình Huệ mă bruă hăng khua mua phun git gai ping gah tơring čar Khánh Hòa hăng boh tơhnal mă bruă kơđi čar thun 2023, anăp ngă bruă thun 2024 laih anun pơtong glăi bruă ngă tui Hră pơtrun mrô 55 mơ̆ng anom bruă khua pơ ala mơnuih ƀôn sang dêh čar brơi lông ngă tui lăng tơlơi phiăn pơkă phara, jơlan hơdră pơđĭ kyar tơring čar Khánh Hòa hăng pôr pơthâo mrô rơnoh pơkă hnong pơdong plơi prong phrâo cam Lâm, tơring čar Khánh Hòa.