Pơ ala brơi Ping gah Khua pơ ala mơnuih ƀôn sang dêh čar, Jơnum min apăn bruă Khua pơ ala mơnuih ƀôn sang, Khua git gai pơ ala mơnuih ƀôn sang dêh čar tŭ yap hăng pơpŭ ƀing khua mua hăng ƀing apăn bruă đah kơmơi amăng anom bruă Khua pơ ala mơnuih ƀôn sang. Khua git gai pơ ala mơnuih ƀôn sang dêh čar ơi Trần Thanh Mẫn lăi pơtong, Ping gah hơmâo lu tơlơi pơtrun, tơlơi črâo ba, anai lĕ tơlơi đing nao ƀing apăn bruă đah kơmơi kơ pran jua hăng gơnam tam, ngă gêh gal kiăng đah kơmơi dưi gum pơgôp, pơhrăm pô, mut hrŏm ngă bruă mơnuih mơnam.

Yua anun, bruă đing nao đah kơmơi ƀu djơ̆ kơnong amăng hơdôm hrơi lơ 8/3 ƀudah 20/10 đôč ôh mơ̆ ăt kiăng đing nao rĭm hrơi, na nao. Khua git gai pơ ala mơnuih ƀôn sang dêh čar ơi Trần Thanh Mẫn pơtă jơnum min djru bruă khua pơ ala amăng rơwang ngă bruă Khua pơ ala mơnuih ƀôn sang tal XVI, Khul pơ ala mơnuih ƀôn sang djop gưl thun 2026-2031 kiăng ngă tui djơ̆ hơdôm tơlơi črâo trun mơng Ping gah kơ mrô đah kơmơi ngă khua pơ ala, mut hrŏm amăng Khul pơ ala mơnuih ƀôn sang djop gưl, mrô đah kơmơi mut hrŏm ngă khua mua ƀơi hơdôm anom bruă amăng Ƀirô Khua pơ ala mơnuih ƀôn sang dêh čar.